Permit sa Casa Rosita ipakanselar

CEBU, Philippines - Ipakanselar ni Mayor Tomas Osmeña ang business permit sa kontraktor sa Casa Rosita subdivision diha sa barangay Tisa ning siyudad.

Kini human usab matumba ang pader sa nahisgutang subdivision nga nidat-og sa usa ka pinuy-anan sa sitio Tabay-Lawom nga mikalas kang Wilma Parba. Matud pa ni Osmeña nga siya dili makatugot nga dunay susamang insidente nga mahitabo mugna sa pagpabaya sa Undaloc Construction.

Nagkanayon ang mayor nga bisan kung siya dili usa ka engineer apan iyang naobserbahan nga sayop ang trabaho sa nahisgutang construction firm.

Kini tungod kay giingong giabunuhan niini og yuta ang pader nga walay kaagian sa tubig hinungdan nga kini nibusikad ug natumba pagbunok sa uwan.

“That’s a criminal neglect…if you are a contractor you should know better that you don’t do those things and we can’t allow things like that to happen,” sumala ni Osmeña.

Gimanduan na sa mayor ang assistant building official nga si Engineer Josefa Ylanan paghikay alang sa kanselasyon sa business permit sa kontraktor.

Sa samang higayon, pabuhatan usab ni Osmeña og cease and desist order ang site development hangtud nga masigurong luwas ang pagtrabaho niini.

“We can’t allow that development to continue as is…they have to remove the old wall, they have to remove the back fill, they have to do so many things,” matud ni Osmeña.

Ang mayor nakighinabi na sa pamilyang Arcenas nga maoy tag-iya sa Casa Rosita aron patubagon sa gidangatan sa pamilyang Parba.

Hinuon mihatag na si Danny Arcenas representante sa pamilyang Arcenas og pasiunang P20 mil ngadto sa nagbangutan nga pamilya isip burial assistance.

Kini atol usab sa sabot-sabot nga gipasiugdahan ni Tisa barangay captain Eduardo Cabulao human sa insidente. (Elly Bolonos)