2 Sugboanon apil sa Marines napatay sa Abu Sayyaf gikasubo ni Tomas

CEBU, Philippines - Gikasubo ni   Mayor Tomas Osmeña ang gidangatan sa duha ka Sugbuanon ug usa ka Bol-anong sakop sa Philippine Marine Corps nga lakip sa 23 nga nakalas sa pagpakiggubat batok sa mga sakop sa Abu Sayyaf Group (ASG) sa Basilan sa Mindanao.

Si Osmeña nga battalion commander usab sa 51st Marine Reserve Battalion nga nakabase dinhi sa Kabisay-an nga ang hurisdiksyon naglakip sa nahisgutang duha ka probinsya.

Matud pa ni Osmeña nga gawas sa mga biktima, iya usab nga gikaluy-an ang mga asawa niini nga sayo kaayong nabiyuda.

“It’s a very depressing job, it’s a very depressing assignments being a young wife cried in your shoulder, I don’t know what to do,” sumala ni Osmeña.

Taliwala sa iyang kasubo wala hinooy gisaad nga ayuda ang mayor ngadto sa nagbangutan nga pamilya sa mga biktima tungod usab sa iyang kahadlok sa Commission on Audit (COA).

Apan gitataw ni Osmeña nga siya ug ang iyang battalion maninguha nga makatambong sa lubong sa nahisgutang mga sundalo.

Gipadayag sa mayor nga andam siyang mogasto sa kaon ug pamasahe sa iyang mga sakop ug sa ubang gikinahanglan niini pagtambong sa funeral rites.

“I think that’s the most I can do, to provide assistance to our reservists (meals and traveling expenses) at my risk,” sumala ni Osmeña.

Ang Central Command (Centcom) wala pa hinuon masayod kung kanus-a ilubong ang tulo ka mga sundawo nga bag-o lang gihatod sa ilang tagsa-tagsa ka pinuy-anan.

Matud pa sa tigpamaba sa Centcom, Major Wilson Feria, nga pasiuna niyang nasayran nga gusto sa mga tagtungod nga hayaon pa sa ilang panimalay ang mga biktima.

“Ang nadunggan nako gikan sa mga tagtungod nga at least 5 days to one week pero amo lang i-task ang in-charge sa area kung kanus-a ang schedule,” sumala ni Feria.

Sila Marine Privates Lemuel dela Cruz sa Daan Bantayan, Ridintor Batoctoy sa Dalaguete ug Elfie Igcalinos sa Bohol nga pulos sakop sa Marine Raider Company, lakip sa 23 ka mga sundawo nga nakalas dihang sila mi-reinforce sa mga Scout Rangers nga gikatahong nakiggubat sa mga sakop sa ASG niadtong miaging Agosto 12 sa Tipo-Tipo, Basilan.

Gibana-banang moabot sa kapin 60 ka mga tawo ang nakalas sa maong engkwentro nga gipasiugdahan sa militar aron sulngon ang labing dakong kampo ug pabrika sa mga improvised explosive device(IEDs) sa ASG.   (Elly Bolonos)