Registration sa inmates anha buhaton sa CCJ

CEBU, Philippines - Nisugot na ang Cebu City Comelec Office sa hangyo sa Cebu City Jail pagpahigayon og satellite registration diha sa maong bilanggoan sumala pa ni City Election Officer Marchel Sarno.

Gitakda karong umaabot nga Sabado ang pagpahigayon og satellite registration sa Cebu City Comelec North District diha sa City Jail. Matud pa ni Sarno nga ang ilang tumong niini nga mahatagan usab og kahigayunan ang mga binilanggo nga makabotar sa sunod tuig nga eleksyon.

Mamahimong makapa-rehistro mao kadtong mga bilanggong wala pa makombikto.

“Bisan kun gihikawan sila og liberty sa ilang movements but that doesn’t mean nga ato pud silang hikawan sa ilang katungod sa pagbutar,” sumala ni Sarno.

Gipaabot nga human unya sa north district, musunod usab ang Comelec sa south district pagpahigayon og off-site registration diha sa City Jail.

Butang nga gihangop ni Jail Warden Supt. Efren Nemenio nga makatulo na ka higayon nga mipadangat og suwat-hangyo ngadto sa Comelec.

Gibutyag ni Nemenio nga ang City Jail dunay gatusan ka mga inmates nga dili pa kombiktado ug mahimo pang makaparehistro.

Nagkanayon ang Jail Warden nga mas gamay na lang unya ang risgo kung anha na sa City Jail ipahigayon ang registration sa mga binilanggo.

Nasayran nga gisugdan na sa City Jail ang paghatod sa mga inmates ngadto sa City Comelec alang sa pagparehistro kanila ug 14 na ang labing uwahing gipa-rehistro human hatagi og court order alang sa maong katuyoan. -  BANAT NEWS