Naeskapuhang J'guards sad-an

CEBU, Philippines - Nagpabaya sa ilang katungdanan ang duha ka jailguards sa Cebu City Jail nga naeskapuhan og binilanggo niadtong Agosto 8 base sa resulta sa gihimong imbestigasyon sa kadagkuan sa Cebu City Jail.

Ang nakit-ang sad-an mao sila si JO1 Eugenio Torres ug JO1 Benjie Saking nga maoy gitahasan pagbantay ni Arnel Saladaga.

Si Saladaga nga makapila na nieskapo ug sa labing ulahing pag-eskapo niini sulod sa Cebu City Medical Center nasikop ra hinuon pagbalik diha sa Sudlon, Lahug sulod sa pipila ka oras niining pagtago-tago.

Apan matud ni City Jail Warden Supt. Efren Nemenio nga iya nang giduso ngadto sa ilang rehiyonal nga buhatan ang investigation report batok sa duha. Matud pa niya mahimong masuspenso o mataktak sa serbisyo ang duha kun mapamatud-ang sad-an. -  BANAT NEWS