Call center agent gihimulbolan sa tulisan

CEBU, Philippines - Gihimulbolan sa mga tulisang de motor ang usa ka call center agent didto sa zone Gabi, barangay Paknaan, dakbayan sa Mandaue sa miaging kaadlawon.

Ang biktima mao si Louie Jay Banid, 18, ulitawo nga nagtrabaho isip call center agent sa nahisgotang dakbayan ug nagpuyo sa dalan T. Padilla, dakbayan sa Sugbo.

Si PO2 Jay Ondo, PO2 Rowen Donaolao ug PO1 Basil Evangelista sa mobile patrol group sa Mandaue City Police Office (MCPO) mibutyag sa Banat News nga samtang nagpaabot og sakyanan sa zone Gabi ang biktima kay mopauli na, kalit lang kining gihunongan sa motorsiklo nga giluwanan sa duha ka wala hiilhing mga lalaki.

Ang angkas niini sa luyo maoy miduol sa biktima ug mition sa iyang armas uban sa pag-ingon nga “tulis ni bai”.

 Gilangkat dayon niini ang knapsack sa biktima nga may sulod nga cellphone, sapatos, relo de pulso, pitaka nga may sulod nga kuwarta ug uban pa.

Misakay dayon og balik sa motorsiklo ang tulisan dayong pabulhot niini ug pag-adto pa sa mga polis bisan aso nalang sa motorsiklo wala na. (Romeo T. Limpangog)   (BANAT NEWS)