Shabu gisulod sa platito

CEBU, Philippines - Usa ka level one drug pusher sa Lilo-an ang nasikop kagahapon sa buntag sa gipahigayong operasyon sa Provincial Anti-Illegal Drugs Special Operation Task Group (PAID-SOTG) ug sa kapolisan sa Lilo-an.

Ang suspetsado giila sa mga polis nga si Dante Rubia Halang, 32 residente sa nahisgutang lugar.

Ang PAID-SOTG nga gipangulohan ni Supt. Larson Dechino ug Sr. Insp. Ramon Ortiz sa Liloan police station armando sa search warrant nga giluwatan ni Regional Trial Court (RTC) Judge Ulric Canete sa Branch 55 dakbayan sa Mandaue.

Nakuha sa operasyon ang shabu nga gibutang sa platito, usa ka medium ug miniature sizes nga plastic packs nga dunay sulod nga shabu, digital weighing scale, usa ka kalibre .45 nga pistola ug duha ka magazine nga may lima ka buhing bala, usa ka plastic container nga dunay sulod nga mga paraphernalia alang sa pag-repack og shabu, P30 mil nga kwarta nga gituohang halin sa ginadiling drugas ug tulo ka Nokia cellphone nga gituohang gigamit sa ilegal nga kalihukan.

Si SPO1 Claudio Castro Jr., duty desk officer sa Lilo-an Police Station sa pakighinabi niini sa Banat News kagahapon nagkanayon nga si Halang nabutang nga level one drug pusher sa ilang lungsod ug nasikop na kaniadto apan nakapiyansa. (Brenda Batuto)   (BANAT NEWS)