CEBU, Philippines - Ipataktak sa trabaho ang traffic enforcer nga gidakop sa mga elemento sa National Bureau of Investigation (NBI-7) niadtong miaging semana human ireklamo og pagpangilkil.
Kini maoy gibutyag ni Citom executive director Arnel Tancinco nga giluwatan ni Mayor Tomas Osmeña human masayod sa maong taho.
Matud ni Tancinco nga gipakighinabian na sa mayor ang labaw sa personnel department ug gusto niining tangtangon sa trabaho si Christian Catoto.
Nasayran nga si Catoto rekomendado sa asawa sa mayor nga si Margot Osmeña diha sa City Hall pipila ka tuig na ang nakalabay.
Apan matud pa ni Tancinco nga polisiya usab sa mayor ang pagtangtang niadtong mga badlungon nga mga empleyado sa City Hall.
“Ang stand ni mayor nga kung madakpan sorry, kun mangutong mo pagbantay gyud nga dili madakpan pero the only way nga ma-prevent na dili gyud buhaton,” sumala ni Tancinco.
Ang traffic enforcer nga si Catoto gipasakaan na sa NBI-7 og kasong kriminal ug administratiba ngadto sa Ombudsman Visayas.
Gireklamo si Catoto sa taxi driver nga si Jessie Rica nga nangayo kaniya og P3 mil bugti sa pag-uli niini sa lisensya human makahimo og mga traffic violations.
Apan inay motuman sa ilang sabot, ang taxi driver nidangop sa NBI-7 aron mapahigayon ang entrapment operation ug gipadakop si Catoto.
Wala hinuon masikop ang traffic enforcer sibo sa plano sa NBI-7 ug sa reklamante tungod kay wala dawata ni Catoto ang kwarta sa dapit nga ilang gisabutan sa taxi driver.
Gipasakay si Rica sa motorsiklo ni Catoto ug gidala sa usa ka gasoline station ug giingong didto na gipangayo sa suspetsado ang kuwarta.
Sa pagtoo ni Rica nga wala makasunod kanila ang mga operatiba sa NBI-7, nagdumili ang taxi driver paghatag sa kwarta ug nangita og laing rason.
Wala matigayon ang planong entrapment operation apan nasundan si Catoto sa mga sakop sa NBI-7 sa pinuy-anan niini ug didto na kini gidakop.
Nasayran nga si Catoto dunay upat usab ka pending administrative complaint sa Citom nga hangtud karon giingong wala niini tubaga. (Elly Bolonos) (BANAT NEWS)