City mobayad nasab sa utang para SRP

CEBU, Philippines - Gitakda na usab nga mobayad ang kagamhanan sa dakbayan sa Sugbu sa dakong utang niini pag-ugmad sa South Road Properties (SRP) sa sunod semana.

Matud pa ni City Treasurer Ofelia Oliva nga ang city government mo-data na usab sa binilyon ka pesos niining loan karong Agosto 20.

Wala hinuon makasiguro ang City Treasurer sa tukmang bayranan sa kagamhanan sa dakbayan tungod kay kini bag-o lang usab nga miasumir sa iyang katungdanan.

Apan matud sa iyang assistant nga si Emma Villarete, nga posibleng susama ra usab ang ilang mabayran sa ilang nadata niadtong miaging Pebrero 20.

“Dili pa gyud mi ka-project kay ang actual conversion and apparent fund exchange ana at the time man of payment, pero mura’g moabot lang gihapon og 400 million pesos,” sumala ni Villarete.

Ang city government mibayad niadtong buwan sa Pebrero og P400,075,436.64 milyones sa obligasyon niini ngadto sa nasod sa Japan.

Sa kinatibuk-an, mokapin na sa P2.5 bilyones ang nadata sa kagamhanan sa dakbayan ngadto sa maong nasud pinaagi sa Land Bank of the Philippines.

Ang nahisgutang kantidad giingon ni Villarete nga naglakip na usab sa principal sa utang ingon man sa interes niini matag tuig.

Nasayran nga ang City government maghatagan usab ngadto sa nasudnong kagamhanan og guarantee fee sa maong utang matag tuig.

Matud ni Villarete nga muabot na sa P396.6 milyones ang kinatibuk-ang nabayad sa kagamhanan sa dakbayan ngadto sa national government.

Ang City government magbayad og usa ka porsiyento sa utang niini ngadto sa nasudnong kagamhanan pinaagi sa Department of Finance.

Kaduha modata ang kagamhanan sa dakbayan sa loan niini matag tuig ngadto sa nasod sa Japan sukad niadtong tuig 2005 hangtud sa tuig 2025.

 Gipadayag hinuon ni Villarete nga dili na maglisod ang kagamhanan sa dakbayan sa pagbayad sa maong utang tungod kay nagsugod na pagkahalin ang SRP.

Gani miingon si Villarete nga sila duna nay gigahin nga pundo alang sa ikaduhang pagbayad sa City government niining tuiga. - Elly Bolonos (BANAT NEWS)