25-anyos gitigbas, naangol

CEBU, Philippines - Naangol ang usa ka 25-anyos nga lalaki human kini gitigbas sa usa ka lalaking kauban sa iyang inahan sulod sa usa ka payag kagahapon sa kaadlawon diha sa sitio Calubihan, barangay Tabok, dakbayan sa Mandaue.

Si SPO1 Marlowe Binangbang sa kapolisan sa Presinto 3 sa Basak Police Station miila sa biktima mao si Ronaldo Encabo, 25, kinsa naigo sa iyang walang kamot.

Samtang gitumbok nga mitigbas kaniya ang suspek nga si Paquito Cabaybay, 52, minyo nga lumad nga taga Leyte ug temporaryong nagpuyo sa maong dapit.

Sumala pa sa kapolisan nga naabtan sa biktima ang iyang inahan ug ang suspek diha sa maong payag apan nakabantay ang naulahi ug walay daghang pasumangil gitigbas ang batan-on.

Sumala pa sa mga saksing kauban sa biktima nga nagkabuang og panagang sa pagpanigbas si Encabo samtang nagdagan-dagan palayo sa suspek.

Wala pa maklaro sa kapolisan kung dunay relasyon ang inahan sa biktima ug ang suspek o ba kaha dunay gilalisan ang duruha nga misangpot sa pagpanigbas.

Ang biktima nga gidala sa Eversely Child Sanitarium Hospital sa barangay Jagobiao ug padayon kining giatiman sa mga doktor ug ang suspetsado nga nakapahilayo ang padayon pa usab nga gipangita sa kapolisan. - Romeo Limpangog ug Bong Soriano (BANAT NEWS)