Minero Natabonan

CEBU, Philippines - Patay ang usa ka minero human matabuni sa nahunlak nga mga debris sa carbon samtang nagtrabaho ilawom sa Ibalong Mining Company nga nahimutang sa bukirang bahin sa sitio Canlawilaw, barangay Dumalan lungsod sa Dalaguete niadtong Miyerkules sa alas 9:30 sa buntag.

Gibana-banang usa ka oras kapin una maugkat ang biktima sa mga kaubanan niini human matabuni ug bisan patay na kini gidala gihapon nila sa Ildefonso Alcantara Hospital sa lungsod sa Dalaguete ug kini gideklarar sa doktor nga patay na.

Ang biktima mao si Charlie Bismanus, 20, molupyo ra sa nahisgutang lugar ug nagtrabaho sa nahisgutang minahan.

Matud ni PO2 Reynaldo Amarillento sa Dalaguete Police dihang nahinabi sa Banat News gikatahong natagakan ang biktima sa nahunlak nga carbon ug mga debris samtang nagtrabaho ilawom sa minahan.

Ang maong minahan nakasugat usab kini og aksidenti pipila ka tuig na ang nilabay human nibuto ang methane gas ilawom sa minahan ug nakapatay og walo ka mga trabahanteng minero nga na-trap sa ilawom.

Nunot niini ang direktor sa Department of Energy (DOE-7) Engr. Antonio Labios daling nimando og imbestigasyon pagtino sa tinuoray'ng hitabo.

Kagahapong adlawa nagpadala dayun og team si direktor Labios sa lungsod sa Dalaguete pinangulohan ni Engr. Ed Amante nga maoy nihimo og personal nga pakisusi sa maong minahan.

Ang report sa maong team maoy basihan unya sa direktor kun angay bang temporaryong pasirad-an ang operasyon sa maong minahan samtang magpadayon ang imbestigasyon sa maong hitabo.

Samtang gibutyag ni PO2 Amarillento nga padayon karun ang gihimong imbestigasyon sa ilang buhatan kabahin sa maong panghitabo.

Ang patay'ng lawas sa minero kasamtangan karung gipahiluna sa Saint William Funeral Homes sa lungsod sa Dalaguete ug ang kabanay niini nanawagan og ayuda sa management. -  BANAT NEWS