Gwen miangkon nasayop 'palit sa balili lot

CEBU, Philippines - Giangkon kagahapon ni Gobernador Gwendolyn Garcia ang responsibilidad sa kasaypanan sa Kapitolyo pagpalit sa Balili property sa Naga nga tipik niini anaa pa ilawom sa dagat.

Matud ni Garcia nga nasayop ang Kapitolyo pagpalit sa Balili Beach tungod sa wala pagtan-aw sa wala pa kini bayri. Wala usab siya magtuon sa mga tawo nga mipresentar sa luna ngadto kaniya.

Gipasalig hinuon niya nga magmabinantayon na siya sa sunod nga mga transaksiyon.

Sa pikas bahin gipasalig sa geodetic engineer nga mopatim-aw siya sa Kapitolyo sa higayon nga mahuman na ang gipahigayong survey sa napalit niining Balili Property sa siyudad sa Naga.

Kini bisan pa man kung ang geodetic engineer nga si Fortunato Lazaro dunay pagduha-duha sa gipadangat nga imbitasyon sa kagamhanang probinsyal.

Ang Kapitolyo nakuryuso sa gihatod nga mapa sa geodetic engineer ngadto kang Mayor Tomas Osmeña sa sayong bahin niining semanaha.

Kini tungod kay sa survey nga gipahigayon ni Lazaro sa 25 ektarya nga Balili property, lima lang ka ektarya niini ang giingong dry land kun mala.

Ang 13 ka ektarya makita sa gihimong sketch ni Lazaro nga tubigan apan mahimo hinuong maabunuhan ug ang laing pito ka ektarya anaa ilawom sa tubig.

Ang survey gihimo sa geodetic engineer upat ka tuig na ang nakalabay dihang usa ka pribadong kompanya ang mopalit unta sa maong luna.

Matud pa ni Lazaro nga siya unya na mopatim-aw sa buhatan ni Gobernadora Gwendolyn Garcia kung mahuman na ang gimando niining survey.

“Ang akong gusto nga mahuman ang ilang gipahigayong survey ba kay aron makomparar nato kay dugay na man tong akong survey,” sumala ni Lazaro.

Nagtuo hinuon ang geodetic engineer nga walay gihimong intervention sa kontrobersyal nga luna nga napalit sa Kapitolyo og dul-an sa P100 milyunes.

“Sa akong pagbasa sa newspaper ug pagtan-aw sa picture mura man og way kausaban, tubig man lang gihapon,” dugang pamahayag ni Lazaro.

Nasayran nga ang Ombudsman Visayas nagplanong mopalapad sa ipahigayon niining imbestigasyon pagpalit sa kagamhanang probinsyal sa maong luna.

Kini pinaagi usab sa pagpatawag sa mga opisyal sa Department of Environment and Natural Resources (DENR) ingon man sa Registry of Deeds. - Elly Bolonos (BANAT NEWS)