New Guardians Incorporated molusad og awareness program vs. kriminalidad

CEBU, Philippines - Ang pagpatunhay sa kahapsay ug kalinaw maoy nag-unang tinguha sa New Guardian Inc. ug kini matigayon lamang pinaagi sa pagpakiglambigit sa mga kapolisan nga maoy gitahasan sa atong kagamhanan.

Si FRMG Raul “Boy” Ulcar Carin nga maoy founder sa NGI sa Metro Cebu area dihang nahinabi sa Banat News mopasiugda og mga awareness program ngadto sa kabarangayan alang sa pagpasabot sa mga lumolupyo nga mahalikay batok sa pundok sa mga dautan.

Dugang pa niya nga naglakip sa ilang pahingusgan sa pagahimuong awareness program mao ang pag-ila sa pundok sa mga tawong ang katuyoan mao lamang ang kadaut sa uban.

Matud pa niya nga nalakip usab sa ilang ipahimangno sa maong kalihokan ang pagsulod sa bisyo sa mga batan-on nga naglakip sa pag-inom sa ilimnong makahubog ug pagpanabako sanglit sinugdanan kini sa paggamit sa ginadiling drugas uban sa mga barkada.

Ang grupo makig-alayon unya sa kapolisan ug Philippine Drug Enforcement Agency (PDEA) alang sa maong tinguha. - Romeo Limpangog (BANAT NEWS)