CEBU, Philippines - Nadakpan sa mga ahente sa National Bureau of Investigation (NBI)-7 ang usa ka sakop sa City Traffic Operation Management (CITOM) atol sa entrapment operation kagahapon tungod sa pagpangilkil sa usa ka taxi drayber nga iyang gidakop.
Ang traffic enforcer nga nadakpan nila ni Regional director Medardo De Lemos giilang si Christian Catuto nadestino sa Road Warrior Towing Company.
Si Catuto gireklamong nangilkil sa usa ka Jessie Rica, drayber sa Ritchelda Taxi dihang gipangayoan siya niini og P3 mil human gidakop siya niadtong Biyernes tungod sa kalapasan sa lagda sa trapiko apan giingong wala siya isyuhe og citation ticket.
Matud sa reklamante nga human gikuha iyang lisensya giingnan siya sa kauban sa suspek nga bayran nalang hinungdan iyang gitunolan og P50 ang suspek apan wala kini dawata ug misugyot nga ipalukat nalang kini sa buhatan sa Citom.
Apan dihang gibalikan niya niadtong Lunes ang iyang lisensya aron lukaton gipangayoan na hinuon siya sa suspek og P3 mil maong midangop siya sa NBI ug gi-setup ang entrapment nga himuon diha sa N. Bacalso Avenue.
Si Catuto gikatahong daw nakamatikod nga dunay entrapment nga mahitabo daling mipasakay ni Rica sa iyang motorsiklo ug gidala kini diha sa gasoline station.
Si Rica nga nakabantay nga nabiyaan ang mga ahente sa NBI gibawi niini ang kwartang marked money gikan ni Catuto apan ang naulahi mibawi usab sa lisensya ni Rica dayon misutoy sa pagpadagan sa iyang motorsiklo.
Ang NBI migukod sa suspek ug kini naabtan diha sa Blessed Sacrament sa Labangon.
Si Catuto miangkon sa iyang kasaypanan sa wala niya pag turnover sa lisensya ngadto sa ilang buhatan apan andam hinuon siyang mangayo og pasaylo ngadto sa drayber nga si Rica.
Sa pagsuwat ning balita kagahapon si Catuto padayong gi-kwestyon sa mga ahente sa NBI aron ilang tun-an kun unsa nga kaso ang ilang ipasaka batok sa maong suspek sanglit wala marekober ang marked money sa iyang posisyon. - Rey Pasaporte (BANAT NEWS)