Panagsungi ni Gwen ug Greg gitinguhang hiluton

CEBU, Philippines - Malaumon ang ubang mga opisyal sa One Cebu Party nga mahilot pa ang kasungian karun tali nila ni Gobernador Gwendolyn Garcia ug Bise Gobernador Gregorio Sanchez Jr. Nagtuo si bokal Victor Maambong nga mahilot ra ug dili modako ang gamay’ng panagbingkil sa duha ka mga opisyal nga maoy presidente (Garcia) sa One Cebu Party ug bise presidente (Sanchez) sa maong partido.

Gipadayag sa bokal nga gamay ra kaayong butang ang gikasungi-an ug dili sila makatugot nga mao kini hinungdan sa pagkabuak sa grupo.

Sa nasayran si Sanchez Jr. mibahad nga motukod og laing partido kung dawaton sa gobernador ang magtiayong sila si Mayor Constancio Suezo ug asawa niining bise mayor nga si Rosemarie Suezo tungod kay giingong ang duha maoy nangusog ug mipaluyo sa ‘Sugbuak’ kaniadto.

 Matud ni Maambong sa dihang nahinabi sa Banat News sa iyang mobile phone kagahapon nga dunay makinarya sa politika ang duha ka dagkong opisyal sa probinsya.

Si Maambong nagkanayon nga misugot si Sanchez sa maong planong panagtigom lakip na ang gobernador. - Rey Pasaporte (BANAT NEWS)