Pribadong luna sa SRP bayran sa siyudad

CEBU, Philippines - Nagkasabot na ang mga opisyal sa siyudad sa Sugbu nga bayran ang pribadong luna diha sa barangay Mambaling nga naapektahan sa pagtrabaho sa South Road Properties (SRP).

Kini human makigtagbo si Mayor Tomas Osmeña sa mga konsehal alang sa pagpangita og kasulbaran sa nahisgutang problema.

Una nang nagduha-duha si Bise Mayor Michael Rama pagbayad sa dul-an sa tunga ka ektaryang luna tungod kay dunay portion niini nga giingong ilawom usab sa tubig.

Dili gusto si Rama nga masusama ang City government sa kagamhanang probinsyal nga nakontrobersyal tungod sa pagpalit niini og luna nga gisanapan.

Kapin sa P13 milyones ang gipangayo sa tag-iya nga si Roque Ting ngadto sa kagamhanan sa dakbayan isip compromise payment sa iyang luna.

Kini human usab modaog si Ting sa gisang-at niining kaso ngadto sa korte nga nagpabayad sa City government og P60 milyones.

Bisan tuod og niapilar ang kagamhanan sa dakbayan sa desisyon sa korte apan nabalaka si Osmeña nga makabayad sa maong kantidad.

Kini ang hinungdan nga nisugot ang mayor sa gipangayong kantidad ni Ting aron mahuman ug mahatagan na og solusyon ang nahisgutang problema.

“We are only paying the land but we also relieved ourselves to the entire case because it satisfies them (Ting),” sumala ni Osmeña.“   

“We will support the direction that will end the situation for as long that all documentations will be properly addressed,” matud ni Rama.

Una nang nisinta si Osmeña human masayod nga gikwestyon sa bise mayor ang kasabutan nga ilang nakab-ot sa tag-iya sa luna nga si Ting. - Elly Bolonos (BANAT NEWS)