Dir. Aguilus gireklamo

CEBU, Philippines - Mga drayber nga dunay rotang Tabunok-Jaclupan ang miduso og reklamo ngadto sa Ombudsman Visayas batok kang Land Transportation Office (LTO) regional director Raul Aguilos tungod sa giingong wala paghatag niini og pagtagad sa ilang reklamong giduso sa iyang buhatan.

Niadtong Agosto 4, 2009, giduso ni Zaide Bacus, presidente sa United Camp 4-Jaclupan Multicab Operators and Driver’s Association (UCJ-MODA) ang reklamo ngadto sa Ombudsman nga gipirmahan sa 50 ka mga drayber. Ang maong reklamo mahitungod sa paghatag og katungod sa dakbayan ngadto sa mga habal-habal drayber nga makabiyahe sa rotang ilang gisubay.

Nobiyembre 11, 2004 ang konseho sa dakbayan sa Talisay mipasar sa ordinansa nga nag-regulate sa operation sa habal-habal nga nagbiyahe sa rota sa maong mga multicab, apan kini nakaapekto sa kinitaan sa maong mga multicab nga giisyuhan og prangkisa sa LTO.

Niadtong Abril 28, 2008 ang UCJ-MODA ang mipadala og letter request ngadto sa LTO Central Office sa East Avenue, Quezon City kang Assistant Secretary Arturo Lumibao kabahin sa maong problema.

Si Lomibao migama og endorsement letter niadtong Mayo 28, 2009 ug gi-address kini ngadto kang Aguilos nga paghatag og komento o report kabahin sa nahisgutang reklamo.

Apan matud sa mga drayber nga hangtud karon wala sila makadungog og tubag ug aksiyon sa reklamong ilang giduso.

Ang mga drayber ang mipasangil kang Aguilus nga nakalapas sa Section 5 sa Akta Republika 5713 kon “Code of Conduct And Ethical Standards for Public Officials” nga maoy ilang gibasehan sa pagduso og reklamo ngadto sa Ombudsman Visayas batok sa nahisgutang opisyal sa gobiyerno.

 Si Aguilus sa iyang bahin, sa pakighinabi niini sa Banat News kagahapon nagkanayon nga naglisod sila og padala og tubag sa maong suwat reklamo sa mga drayber tungod kay wala kini return address.

Hinuon miawhag kini sa mga drayber nga pabisitahon sa iyang buhatan aron mahatagan dayon og aksiyon ang ilang problema.

Si Aguilus nagkanayon usab nga ang regulation sa mga habal-habal usa ka kalapasan sa Akta Republica 4136 kon “Code of the Land Transportation of the Philippines” ug ang mga Local Government Unit (LGU) dili unta mobuhat og kalapasan sa provision sa national laws.

Si Aden Delsa nga gisangonan ni Aguilus sa nahisgutang problema gikatakdang mohatud og suwat ngadto sa Talisay City Hall kabahin sa legalidad sa ilang ordinansang nag-regulate sa habal-habal. Si Delsa midugang nga karong adlawa magpahigayon sila og operation batok sa mga habal-habal sa siyudad. - Brenda Batuto (BANAT NEWS)