Naghikog sa kampanaryo way foul play

CEBU, Philippines - Walay foul play ang kamatayon sa usa ka 24 anyos nga lalaki nga gituohang naghikog niadtong miaging buntag pinaagi sa paglayat sa 60 ka tiil nga gihabugon nga kampanaryo sa San Fernando Parish Church sa barangay Poblacion, sa lungsod sa Liloan.

Kini ang gipadayag ni SPO1 Claudio Castro Jr., nga nahinabi sa Banat News sa follow up nga gihimo kagahapon.

Matud pa niya nga ang namatay nga si Salde Reuyan nga taga sitio Tuburan, sa barangay Jubay sa nahisgotang lungsod may sakit nga nerbyos ug gani nagpaingon na kini sa hospital uban sa iyang inahan gikan sa ilang balay sa Jubay, dihang paghitungod nila sa simbahan, kalit lang nanaog si Reuyan.

Si SPO1 Castro miingon nga naluya og pangita ang inahan ug mao nalay iyang nasayran nianang alas 3:00 sa hapon nga nagkaguliyang na ang katawhan sa palibot sa simbahan dihang kalit lang nga mihagsa sa yuta si Reuyan gikan sa ibabaw sa kampanaryo nga may 60 ka tiil ang gihabugon dungan sa pagbagting sa kampana.

Si Senior Inspector Ramon Ortiz, hepe sa kapolisan sa maong lungsod maoy mipadala sa biktima ngadto sa Vicente Sotto Memorial Medical Center sa dakbayan sa Sugbo sakay sa usa ka ambulansiya apan gideklarar kini sa mga doktor nga patay na paghiabot sa maong tambalanan.

Walay nakita ang mga polis nga si Reuyan gibinuangan og laing tawo nga maoy hinungdan sa iyang kamatayon. - Romeo T. Limpangog (BANAT NEWS)