Laing duha ka bata patay sa dengue

CEBU, Philippines - Laing duha ka mga bata ang namatay sa dakbayan sa Sugbu niadtong miaging semana tungod gihapon sa sakit nga dengue sumala pa sa City Epidemiology Surveillance and Statistics Unit (CESSU).

Giingong moabot na sa 15 ka kinabuhi ang nakalas niining tuiga sa maong sakit. Usa ka babayeng 4-anyos sa barangay Camputhaw ug laing 5-anyos nga batang babaye sa barangay Tisa ang katapusang namatay sa dengue dinhi sa siyudad.

Ang duha ka biktima pulos gidala sa Cebu City Medical Center (CCMC) niadtong Agosto 6 apan ang 4-anyos namatay nianang pagkagabii.

Samtang ang 5-anyos wala usab matabang sa mga doktor sa nahisgutang tambalanan ug nakabsan sa kinabuhi nianang pagka-ugma, Agosto 7.

Subling gipahimangnoan ni assistant City Epidemiologist Durenda Macasucol ang mga Sugbuanon nga ipakunsulta gilayon ang miyembro sa pamilya nga hilantan.

Nagkanayon si Macasucol nga dili na angayang paabuton pa nga mo-grabe ang kahimtang sa pasyente aron kini matabang pa kung nataptan og dengue.

Gipadayag ni Macasucol nga libre ang serbisyo sa mga health center ingon man sa City Health ug sa CCMC alang niadtong gipanghilantan. Sa susamang kalamboan, gitahasan na ni Bise Mayor Michael Rama ang tanang mga konsehal sa siyudad nga motabang sa dengue brigade sa kabarangayan aron maatiman gilayon ang panginahanglan niini.

Partikular nga ginganlan sa bise mayor ang barangay Lorega San Miguel, Labangon, Talamban ug Mambaling nga giingong padayon nga nisaka ang dengue cases.

Nasayran nga mokapin na sa 500 ang mga kaso sa dengue dinhi sa siyudad sukad niadtong Enero hangtud sa sayong bahin niining buwana apan kini mas ubos itandi sa dengue cases sa dakbayan sa susamang period sa miaging tuig nga dunay kapin sa 800 ka kaso ug kapin usab sa 30 ang namatay. (Elly Bolonos)    (BANAT NEWS)