DDB nagpasalamat ni Aumentado

CEBU, Philippines - Ang mga kadagkuan sa Dangerous Drugs Board (DDB) nagpasalamat kang gobernador Erico Aumentado sa lalawigan sa Bohol tungod sa iyang paggahin og P250 mil nga trust fund nga magamit sa Philippine National Police (PNP) ug Philippine Drugs Enforcement Agency (PDEA-7) isip buy bust money.

Kini ang gibutyag ni DDB Undersecretary Clarence Paul Oaminal, dihang gikahinabi sa Banat News atol sa pagbukas kagahapon sa seminar bahin Anti-Illegal Drugs Campaign sa probinsya sa Bohol nga molungtad hangtod karong Huwebes.

Ang maong kalihukan gipahigayon didto sa Bohol Cultural Center nga gipangulohan ni Usec. Oaminal, Gobernador Aumentado, PDEA-7 director Randy Pedroso, Sr. Supt. Edgardo Ingking, director sa Bohol Provincial Police Office (BPPO) ug uban pang mga opisyal sa lalawigan.

Gikalipay usab ni Usec. Oaminal ang pasalig ni Gobernador Aumentado nga iyang lukatan og life insurance ang tanang police ug mga ahente sa PDEA sa iyang lalawigan kinsa hugot nga nakighiusa sa pagpatuman sa kampanya batok sa illegal nga drugas .

Midugang si Aumentado nga ang mainitong pakighiusa sa mga lokal nga opisyal sa kagamhanan ug sa mga sibilyan dako kaayo og ikatabang sa gobyerno sa kampanya batok sa ginadiling drugas.

Gibutyag ni Oaminal nga sa pagbukas sa maong seminar kagahapon, mikabat sa dul-an 900 ka mga sakop sa kapulisan sa Bohol ang mitambong hinungdan nga gikalipay kaayo kini og dako sa taga DDB ug PDEA-7.

Nagpasabot lamang kini nga makig-abin gyud sa kampanya sa gobyerno batok sa ginadiling drugas ang maong mga tinugyanan sa balaod , matud pa ni Oaminal. (Guam P. Logroño)   (BANAT NEWS)