CEBU, Philippines - Kritikal ang kahimtang sa usa ka traffic enforcer kinsa napusilan samtang nagbantay sa trapiko sa dalan Maximo Patalinjug sa Mactan Export Processing Zone (MEPZ) II, barangay Basak, dakbayan sa Lapulapu sa miaging gabii.
Ang biktima mao si Archie Cahayagan, 20, minyo, nga taga sitio Tugas sa barangay Gun-ob ug sakop sa City Traffic Management System (CTMS) sa nahisgotang dakbayan.
SPO1 Fredireck Islet sa homicide section sa kapolisan sa maong dakbayan nga nahinabi sa Banat News miingon nga nagtuman lang sa iyang katungdanan ang biktima sa pagpahapsay sa dagan sa mga sakyanan sa maong lugar.
Dihang may duha ka wala hiilhing lalaki nga nagsakay og motorsiklo mihunong sa iyang duol ug ang angkas niini nanaug ug gidul-it niini ang iyang .45 kalibre nga pistola sa kilid sa biktima dayong pabuto.
Human matumba ang biktima, mibiya usab ang kriminal ug mibalik pagsakay sa motorsiklo nga nagpaabot kaniya dayong bulhot pahilayo gikan sa maong lugar.
Nasabak ang biktima sa duha ka mga bala busa talandugon ang kahimtang niini dihang gihatod ngadto sa Mactan Doctor’s Hospital .
Si SPO1 Islet miingon nga padayon pa nilang gipangita ang kriminal ug sa pagsuta kun may labot ba sa trabaho sa biktima ang nakaingon sa maong pagpamusil. (Romeo T. Limpangog ug Bong Soriano) (BANAT NEWS)