Love triangle nga anggolo gisuta sa pagpatay unta sa konsehal

CEBU, Philippines - Love triangle o kasina sa negosyo maoy duha ka anggolo nga gisuta karon sa kapolisan sa lungsod sa Cordova nga nagpaluyo sa tinguha unta nga pagpusil kang konsehal Victor Tago sa maong lungsod sa miaging gabii.

Matud pa sa hepe sa Cordova Police Station, Felix Pacaldo nga giandam na karon ang kasong ipasaka batok kang Domingo Balacos, 50, minyo, nga taga barangay Santo Niño, Calambugan, Lanao del Norte kinsa nagpahayahay na karon sa ilang prisohan.

Si Balacos nasikop sa katawhan sa maong lungsod dihang mikagar ang .45 kalibre nga pistola niini ug wala kabuto dihang gikablit na ang gatilyo niini tumong sa tingkoy ni Tago.

Si Tago niadtong higayona nalingaw og tan-aw sa kalingawan sa plasa sa lungsod nga may labot sa Dinagat Festival dihang miduol si Balacos kay buk-an siya’g ulo.

Nakalingi si Tago dihang may mihagtik sa iyang likod, ug sa kakurat niya nga armas de fuego diay tong hagtika, gidumog dayon niya sa Balacos ug didto mitabang usab ang katawhan ug gitabangan og luok ang suspetsado.

Dihang miabot ang polis mitug-an si Balacos nga may tawo nga nagsugo kaniya nga ipapatay si Tago, apan wala siya motug-an sa ngalan sa nagsugo kaniya.   (BANAT NEWS)