CEBU, Philippines - Kapin sa tulo ka oras nga nahunong ang klase sa mga tinun-an sa University of Cebu, Banilad Campus human nakadawat og tawag sa telepono gikan sa usa ka babayeng caller ang usa sa mga secretary sa opisina ni Atty. Agosto Go nga nanghulgang dunay gibutang nga bomba sa ground floor sa maong tunghaan kagahapon sa buntag.
Matud sa mga tinun-an nga dili gustong magpahingan nga nahinabi sa mga tigbalita kagahapon sa buntag nga giputol sa ilang mga magtutudlo ang ilang klase ug pasado alas 9 sa buntag ug mimando kanilang sila pakanaugon kay dunay emergency.
Si Ana (dili tinuod nga pangan) nagkanayon nga wala siyay nakitang mga tinun-ang naratol niadtong higayona tungod kay pulos man walay klaro ang impormasyong ilang nadungog kabahin sa bomba.
Si Atty. Agosto Go, ang tag-iya sa maong unibersidad nahinabi sa Banat News nagkanayon nga human niya madawat ang impormasyon iya dayong gipasuspenso ang tanang klase ug nagpatawag sa bomb squad sa Cebu City Police Office aron maoy mosuhid sa tibuok palibot.
Nasuta nga walay bombang gibutang sa ground floor o bisan asang dapita sa maong campus sumala pang Go hinungdan nga iyang gipabalik ang klase alas 12 kagahapon sa udto. Si Go nagkanayon nga wala pa siya masayod kung unsay motibo sa maong babayeng caller. “We can never tell,..we don’t have the reason for that,” sumala pa sa presidente sa UC.
Gibutyag hinuon ni Go nga duna sila’y caller I.D. apan matud niya nga kasagaran ang mga tawo karon naghupot na og cellphone og posibleng maoy gigamit pagtawag sa iyang buhatan.
Si Sr. Insp. Claudio Casiban, hepe sa Mabolo Police station nga personal usab nga misusi sa palibot sa maong tunghaan nagkanayon nga alas 9:25 nakadawat sa maong tawag si Grace Nod-nod, usa ka working student sa UC.
“I’m going to inform you, that there is a bomb in the ground floor…I’m not kidding dayong butang sa telepono ,” sumala pa sa babayeng caller.
Matud ni Casiban nga wala nalang sila mogamit pa og bomb sniffing dog kay matud niya, visible ra kaayo ang tibuok palibot niini. (Rey Pasaporte) (BANAT NEWS)