Tanod gi-atangan gitigbas sa liog

CEBU, Philippines - Gidudahang gitulis ug gipatay ang usa ka tanod kansang patay’ng lawas nakit-an daplin sa dalan sa bukirang bahin sa barangay Canbantog sa lungsod sa Argao niadtong Domingo sa alas 10:00 sa gabii.

Ang biktima nga nagbuy-od ug wala nay kinabuhi mao si Avelino Abrigana Entienza, 39, taga sitio Talamban barangay Bulak lungsod sa Dalaguete ug tanod sa nahisgutang lugar.

Samtang ang suspek wala pa gyud mailhi sa kapulisan sa paghimo ning balita ug nagpadayon pa ang ilang imbestigasyon.

Matud ni PO1 Benjamen Gerozaga sa Argao Police dihang nahinabi sa Banat News, ang mga drayber sa habal-habal nga nahaagi sa maong lugar maoy unang nakadiskubre sa patay’ng lawas nga nagbuy-od daplin sa barangay road sa maong lugar hinungdan nga gireport dayun nila kini ngadto sa kapitan nga si Felix Famat.

Sa imbestigasyon sa kapulisan nga niresponde sa crime scene nasuta nga dunay samad tinigbasan sa liog ang biktima nga maoy hinungdan sa iyang hinanaling kamatayon.

Nakita usab ang usa ka cellphone sa tupad niini apan wala na diha ang iyang pitaka sa bulsa nga gituohang gikuha sa mga mamumuno.

Dugang nahipos nga impormasyon sa kapulisan ang biktima namalit og mga utanon sa merkado sa barangay Cabantog nianang pagkagabii ug gibanabanang alas 10:00 na sa gabii nipauli ug gituohang giatngan kini sa dalan ug gitigbas patay. Duha ka anggulo ang gisubay sa kapulisan sa posibleng pagpanulis ang motibo sa krimen o ba kaha personal nga kasungi-an. (Darrel Carumba)   (BANAT NEWS)