Hagit ni Cuenco sumada sa SRP suportado - Rory

CEBU, Philippines - Gihangop sa mga opisyal sa kagamhanan sa probinsya sa Sugbu ang gihimo ni Kongresista Antonio “Tony” Cuenco, Cebu City South District, sa paghagit niini ngadto kang Cebu city Mayor Tomas Osmeña nga ipakita niini sa publiko ang tanang sumada ug kamatuoran sa kontrobersyal nga South Road Property (SRP).

Si Rory Jon Sepulveda, ang Capitol consultant sa revenue and information nagkanayon nga ilang gidayeg ug gikalipay ang gihimo sa Kongresista nga sa katapusan nikihol na gyud ug niawhag sa mayor bahin sa SRP.

Una nang mikwestyon niini ang Kapitolyo ug mihagit kang Osmeña sa pagladlad sa mga Sugboanon ilabi na ang iyang mga konstituwente kun unsay tinud-anay nga kahimtang ug sitwasyon sa SRP.

Apan giklaro hinuon ni Sepulveda nga dili sila manginlabot sa kasungian karon tali sa mayor ug Cuenco apan padayong ni-insister si Sepulveda nga duna gyud silay pagdudang may anomaliya nga nagpahipi sa SRP deal.

Matud ni Sepulveda nga mas maayong magpakabana ang Kongresista sa kontrobersyal nga SRP sanglit nasakop man kini sa iyang distrito.

Sa nasayran, gihagit sa kongresista ang mayor nga suginlan niini ang iyang mga konstituwente sa tinuoray nga kahimtang sa SRP ug unsa ang kahimtang sa dakong utang sa siyudad nga maoy nakaingon sa pagtaas sa buluhisan.

Niaslom og sugod ang relasyon sa mayor ug ni Cuenco human gipasanginlan ni Osmeña si Cuenco nga miabandonar sa mga barangay kapitan sa iyang distrito niadtong 2007 barangay eleksyon human ang naulahi milarga didto sa Amerika.

Apan gibutyag ni Cuenco nga si Osmeña ang milarga og una sa Amerika aron pagtan-aw sa away nilang Manny Pacquiao ug Marco Antonio Barrera samtang siya nag-apod-apod og pundo sa mga kandidato nga alyado sa BOPK. (BANAT NEWS)