Sikyu gipusil sa kaubang sikyu

CEBU, Philippines - Samdan sa dughan ang usa ka security guard dihang gipusil kini sa kauban niyang sekyu nga iyang gikulata didto sa President Laurel Street, barangay Kasambagan ning dakbayan sa Sugbo sa miaging gabii.

Ang biktima mao si Elizar Untay Sagayno, 23, samtang ang suspetsado mao usab si Juan Maloloy-on Estardo, 56, pulos security guard sa Eye-eye Security Agency nga nagbase dinhi sa dakbayan sa Sugbo.

Sumala sa kapolisan nga samtang nagbantay ang biktima sa Musse Sports International Corporation sa Kasambagan, si Rosalinda nga asawa sa suspetsado miduol kaniya ug naningil sa bayranan niya sa kuryente apan gisultihan niya nga inig-off na niya siya mobayad.

Apan miabot og kalit ang suspetsado ug nakiglalis kini sa biktima ug dihang nahutdan siya sa katarungan, gipikhan niya sa iyang kumo ang suspetsado hinungdan nga maayong pagkapisok sa mata sa naulahi.

Ang suspetsado kinsa nagtangkil sa iyang service revolver nga .38 kalibre niadtong higayona dali kaayong nakalanit niini ug sa walay pupanagana, gitirohan dayon sa dughan ang biktima.

Maayo gani kay nakadagan ang naulahi busa wala kini matiwasi sa suspetsado.

Gihatod dayon ang biktima ngadto sa Vicente Sotto Memorial Medical Center samtang ang suspetsado nagpahayay na usab karon sa prisohan human kini motahan ngadto sa kapolisan. – BANAT NEWS