Naghikog tungod sa uyab

CEBU, Philippines - Tungod sa gugma naghikog ang usa ka lalaki sulod sa gi-abangang panimalay sa sitio Isla Alegre barangay Basak San Nicolas pasado alas 9 buntag kagahapon.

Si Benjame Pulgo, 25, molupyo sa nahisgutang lugar ug lumad nga taga Mimbontong, Gingo-og City, Misamis Oriental napalgan nalang nga nagbitay na ug wala nay kinabuhi.

Gikatahong bag-uhay pa kining gibiyaan sa iyang hinigugma ug mao karoy gituohan sa kapolisan nga hinungdan sa iyang paghikog. Naabtan pa sa kapolisan sa Cebu City Police Office Homicide Section ang patay'ng lawas ni Pulgo nga nagbitay sa kisami sa maong panimalay nga gi-abangan.

Ang igsuon sa biktima nga si Elvis mitug-an sa kapolisan nga nianang pagkabuntag mi-adto siya sa kwarto sa iyang maguwang aron mokuha og tubig aron maligo sa banyo niini, apan nahibulong siyang wala gyud kini motubag sa iyang pagpanuktok.

Tungod niini iyang gilili ang gamay'ng buslot sa kilid sa doorknob ug nakurat nalang siya nga nagbitay na ang iyang maguwang ug may pisi sa liog.

Sa pagsusi sa kapolisan sa cellphone niini, gikatahong usa ka mensahe sa cellphone gikan sa gituuhang uyab niini ang nabasahan sa kapolisan nga nag-ingong bahala na kining maghikog basta ipauli lang ang cellphone niini. – BANAT NEWS