Nangulatang mga tanod gireklamo

CEBU, Philippines - Gireklamo na ngadto sa duha ka ahensya sa gobyerno ang driver ug mga barangay tanod sa Basak-San Nicolas ning siyudad sa Sugbu tungod usab sa giingong pagpusil ug pagpamun-og niini sa ilang gidakop nga batan-on niadtong miaging Hulyo 28 sa dalan Macopa diha sa maong barangay. Ang biktima nga nagpabilin pa sa Cebu City Medical Center tungod sa liki sa iyang ulo ug mga bun-og nga naangkon sa kalawasan mao si James Junryl Vallejos, 19 anyos.

Si Elsa Vallejos nga inahan sa biktima mao mismo ang mipadangat og suwat-reklamo ngadto sa Ombudsman Visayas ug sa Department of Interior and Local Government (DILG) sa dakbayan sa Sugbo.

Ang gireklamo mao ang mga barangay tanod nga si Victorino Conching, Guilberto Sismar, Roger Luna, Tito Alkuino, Leonilo Navarro ug ang driver nga si Peric Aninipoc.

Gipadayag hinuon ni Cebu City DILG Director Patricio Gabuya nga mas maayong adto una modangop ang inahan sa biktima sa hingtungdang barangay. “Barangay sa, unya pagkahuman, adto dayon sa level sa City Police Office una nila ipakita ang ilang mga ebidensiya, ilang mga witnesses kay duna man gud tay due process nga gitan-aw ani, kay kung modiretso-diretso lang ta ani kuyaw nuon og ma-dismiss ni,” sumala ni Gabuya. (Elly Bolonos)  (BANAT NEWS)