Selebrasyon sa Akrho malinawon

CEBU, Philippines - Malinawon ug walay kagubot ang kasaulogan sa ika-36 nga anibersaryo sa grupo sa fraternity nga Alpha Kappa Rho ning dakbayan sa Sugbu kagahapon.

Sumala pa ni Police Director Sr. Supt. Patrocinio Comendador sa dakbayan sa Sugbu wala gyud sila’y nadawat nga report bahin sa kagubot nga mugna sa maong grupo atol sa ilang kasaulogan.

Matud pa ni Comendador nga siya mismo maoy personal nga mi-superbisar sa iyang mga sakop sa pag-monitor sa grupo kinsa nanagtigom sa alas 10:00 pasado sa buntag didto sa sports complex sa Labangon.

Sumala pa ni Comendador nga nagpakita lang ang maong grupo og maayong timaan nga maayo ang ilang lihok karon itandi sa miaging tuig sa maong kasaulogan diin nakamugna sila og dako kaayong kasamok sa dakbayan.

Matud pa sa labaw’ng opisyal sa kapolisan sa dakbayan nga malinawon usab nga mipahigayon sa ilang “walk against drugs” ang maong grupo diin unang nagtigom sayo kagahapon sa buntag didto sa Fuente Osmeña Rotunda.

Gipahibalo usab gilayon ni Comendador ang mga kadagkuan sa kapulisan sa dakbayan sa Lapulapu tungod kay ang maong grupo mitakda man nga mangaligo og dagat sa usa sa mga beach resort sa Lapulapu. Gikalipay usab sa kapulisan ang gipakita sa maong grupo nga pagbag-o sa ilang kinaiya pinaagi sa pagsanta sa ilang mga sakop nga badlungon ug tigmugna og kasamok. (Guam Logroño) (BANAT NEWS)