'Pet Expo' ilusad karong hapon

CEBU, Philippines - Gipaabot nga magtagbo ang tanang dog club dinhi sa Sugbu atol sa labing una nga “Pet Expo” nga magsugod karong ala 1:00 sa hapon diha sa SM City Cebu parking area.

Dinhi unya makita ang nagkadaiyang matang sa iro nga mopakita usab sa talagsaong abilidad pinaagi sa himoong dog show.

Atol sa Pet Expo dunay ipanghatag usab nga mga dog food, pangpurga, ug libreng tambal alang sa kagiron nga mga iro, ug uban pa.

Samtang ang Department of Veterinary Medicine and Fisheries (DVMF) mopakita usab karong hapon sa mga iro nga mahimong sagupon.

Matud sa labaw sa DVMF, Doctor Alice Utlang, nga pipila ka mistisong askal ang ilang ipasagop niadtong interesado nga mobuhi og iro.

Ang nahisgutang mga iro giingong lakip sa mga stray dogs nga nahipos sa DVMF sa kadalanan sa dakbayan nga wala na lukata sa mga tag-iya.

Gipahibawo usab ni Utlang nga kadtong mga iro sa siyudad nga wala pa mapabakunahi ug marehistro, mahimo usab nga dalhon sa Pet Expo.

Kini tungod kay ilang itanyag ang libreng pagpamakuna ug pagrehistro niini aron mahatagan usab og tag collar, ug ubang mga tambal.

Subling gipahibawo ni Utlang nga adunay dakong multa nga nagpaabot niadtong namuhi og iro nga wala mabakunahi ug wala usab marehistro.

Kini pinaagi usab sa ilang gipatuman nga ordinansa sa siyudad ug sa nasudnong balaud partikular na sa Anti-Rabies Act of 2007.

Kahinumdoman nga gitinguha sa kagamhanan sa dakbayan nga ang kinatibuk-ang siyudad mamahimo nang rabies-free sa sunod tuig. (Elly Bolonos)   (BANAT NEWS)