Prosecutor sa region 11 ug 7 gipasidunggan

CEBU, Philippines - Gihatagan og pasidungog sa mga kadagkoan sa Dangerous Drugs Board (DDB) ang mga sakop sa Public Prosecutors sa Rehiyon 11 gumikan sa maayo nila og agi sa pag-prosecute sa mga kaso bahin sa ilegal nga drugas didto sa dakbayan sa Davao sa miaging adlaw.

Kini gibutyag ni DDB Undersecretary Clarence Paul Oaminal, uban kang DDB Chairman Vicente “Tito” Sotto III sa Banat News kagahapon kinsa nagkanayon nga ang maong mga pasidungog gitunol gayud mismo ni DDB chairman Sotto.

Matud pa ni Oaminal nga ang rehiyon 11 maoy nag-una sa tibuok nasud sa labing dako og porsiyento sa mga nakonbikto sa mga kaso sa ilegal nga drugas nga mikabat og 64.5 porsiyento, diin 149 ang nakonbikto sa 231 ka mga kaso sa ginadiling drugas sulod ning tuiga gikan sa bulan sa Enero.

Gisundan kini sa rehiyon 7 nga may 61 porsiyento, diin 664 ang nakonbikto sa 1,093 ka mga kasong nasang-at sa prosecutor’s office.

Sumala pa ni Oaminal nga ang nakadawat sa pasidungog mao sila si Regional State Prosecutor Antonio Arellano sa rehiyon 11 ug Regional State Prosecutor Fernando Gubalane sa rehiyon 7. Gipadayag ni Oaminal nga kini usa ka timailhan sa maayong koordinasyon tali sa kapulisan ug sa mga sakop sa piskaliya sa nahisgutang rehiyon, pinaagi sa pagtinabangay sa ilang pagpalig-on sa mga kaso batok sa illegal nga drugas.

Samtang sa pikas nga bahin karong Agusto 10-13 ning buwana adto na usab sila sa lalawigan sa Bohol aron ipa-ubos usab sa pagbansay ang 800 ka mga police sa nahisgutang probinsya kalabot sa mga pagpanakop sa illegal nga drugas.

Ang maong kalihukan pangulohan mismo ni Sotto ug mga kadagkuan sa Philippine Drug Enforcement Agency (PDEA-7).

 Ang maong anti-drugs seminar gisuportahan usab ni Gobernador Erico Aumentado sa Bohol. (Guam P. Logroño)   (BANAT NEWS)