2 naghikog sa sobrang kaguol

CEBU, Philippines - Gumikan sa naghinubrang kaguol sa balatian sa lawas ug sa pag-eskuyla, duha ka tawo ang naghikog pinaagi sa paghikot og pisi ug liston sa sapatos sa ilang mga liog sa mga dakbayan sa Lapulapu ug Mandaue, sa miaging adlaw.

Ang namatay gumikan lang sa liston sa sapatos nga gigaid sa iyang liog mao si Reymel Illustrisimo Batiancila , 19, ulitawo, nga taga Santa Fe, isla sa Bantayan, apan kasamtangang nag-abang kini og balay sa sitio Maria, Barangay Pusok, dakbayan sa Lapulapu, ug nagtungha sa University of Cebu Lapulapu Mandaue (UCLM) campus.

Samtang ang naghikog ginamit ang nylon nga pisi mao si Teofilo Mangabon Paglinawan, 42, ulitawo, nga taga Canduman Housing, sa barangay Canduman, dakbayan sa Mandaue.

Si SPO3 Rex Ybañez sa Homicide section sa kapolisan sa dakbayan sa Lapulapu nagkanayon nga naabtan nalang ni Randolf Ong Illustrisimo, ig-agaw sa naghikog nga nagdiwalwal na ang dila sa naulahi, kansang liog gihiktan sa liston sa iyang sapatos ug gigaid ang pikas tumoy niini sa sagbayan sa iyang boarding house.

Gibutyag ni Illustrisimo nga ang nagul-an sa namatay niyang ig-agaw mao ang kanunay nga pagmaymay sa igsoon niini bahin sa iyang pagtuon.

Gumikan malagmit sa hilabihang kaguol sa nabati niyang maymay, nakahukom kini sa pagtapos sa iyang kinabuhi, matud pa ni Illustrisimo.

Samtang si PO2 Roy Andrin sa homicide section sa kapolisan sa Mandaue nagkanayon nga nadiskobrehan ni Wilfredo Inot, paryente ni Paglinawan nga nagdiwalwal na usab ang dila sa naulahi nga wala nay kinabuhi samtang nagbitay kini pinaagi sa nylon nga pisi nga gigaid sa sagbayan sa ilang balay ug ang pikas tumoy niini maoy gihikot sa iyang liog.

Nasayran gikan sa mga paryente nga masakiton og diabetes si Paglinawan ug gumikan sa kaguol nga wala na siya’y kaayohan, nagpakamatay aron matapos ang tanan.

Ang duha ka mga kaso sa paghikog gisuta sa kapolisan nga pulos walay foul play.   (Uban sa report ni Romeo T. Limpangog) (BANAT NEWS)