Gitigbas ulo paksit

CEBU, Philippines - Napaksit ang walang bahin sa ulo sa usa ka 36-anyos nga lalaki human kini gitigbas sa iyahang gikalalis sa sitio Yatian barangay Cabadiangan lungsod sa Compostela niadtong Miyerkules sa alas 9:50 sa gabii.

Ang biktima mao si Vicente Acazo Jr., 36, ug molupyo ra sa maong lugar samtang ang suspek mao si Richard Toroja, 22, taga sitio Lumaroy barangay Mulaw lungsod sa Liloan.

Matud pa ni PO3 Achilles Tano sa Compostela Police dihang nahinabi sa Banat News nagkalalis ang duha niadtong tungura ug misampot sa ilang pag-initay ug panag-away.

Apan dangtan og pipila ka minutos wala makabantay ang biktima nga nikuha og sundang ang suspek sulod sa ilang panimalay ug pagbalik niini sa gawas gidiretso og tigbas ang biktima.

Daling gihatud sa Vicente Sotto Memorial Medical Center (VSMMC) ang biktima samtang ang suspek nadakpan sa nirespondeng mga tanod sa maong lugar. - Darel Carumba (BANAT NEWS)