14 ka priso iparehistro karon

CEBU, Philippines - Laing 14 ka mga binilanggo sa Cebu City Jail ang gikatakdang iparehistro karong adlawa ngadto sa buhatan sa Comelec sa dakbayan sumala pang City Jail Warden Superintendent Efren Nemenio subay usab sa ila nang nasugdan nga kalihukan.

Niadtong miaging Sabado, napulo ka mga inmates ang narehistro sa Comelec sa amihanang distrito ug mahimo nang makabotar sa sunod tuig nga eleksyon.

Nagkanayon si Nemenio nga karong adlawa, ang mga binilanggo na usab sa south district maoy ilang iparehistro ngadto sa Comelec.

Matud sa Jail Warden nga dul-an sa 300 ka mga piniriso ang ilang gikuhaan og court order aron makagawas sa bilanggoan alang sa maong katuyoan.

Ang nahisgutang mga binilanggo padayon pang nagpaabot sa husay sa ilang mga kaso ug giingong mahimo pa nga makabotar sa 2010 elections.

Apan sa kasamtangan miingon si Nemenio nga kapin pa lang sa 20 ka court order ang ilang nadawat hinungdan nga kini lang una ang ilang maparehistro.

Malaumon hinuon si Nemenio nga dunay mapahigayong satellite registration ang Comelec diha sa City Jail human ibasura niini ang ilang duha ka hangyo.

Kini tungod kay giingong duna nay giluwatang resolusyon ang Comelec-Manila alang sa pagpahigayon og off-site registration sa mga bilanggoan lukop nasod.

Apan gitataw sa Jail Warden nga padayon silang mohatod og mga binilanggo ngadto sa Comelec sa siyudad kung duna na usab sila’y madawat nga court order.

Kahinumduman nga sa nangaging presidential elections, gatusan ka mga piniriso sa City Jail nga nalutsan og court order ang nakabotar ug nakapili sa ilang mga kandidato. - Elly Bolonos (BANAT NEWS)