Menor de edad nga tulisan sikop

CEBU, Philippines - Nasikop kagahapon sa buntag sa Talisay City Police Station ang menor de edad nga giingong usa sa mga suspetsadong mitulis ug mipusil patay sa usa ka tinun-an sa nursing niadtong buwan sa Hunyo diha sa Victoria Village, barangay Tabunok, dakbayan sa Talisay.

Si “Puppy” nga giingong 16-anyos nasikop sa mga polis mga pasado alas 9:00 sa buntag diha sa barangay Lower Tever, lungsod sa Minglanilla sa balay sa uyoan niini tungod sa iyang paghupot og pusil.

Nasakmit nila ni SPO1Ricardo Balbutin, PO2 Reynaldo Hoybia, PO2 Roelito Tano ug PO1Jundave David gikan kang Puppy ang .357 nga revolver nga dunay duha ka buhing bala.

Si Puppy ang gitumbok ni Jessie Largo nga unang nadakpan maoy kuyog kang Francisco Bacus Jr. pagtulis ug pagpusil patay kang Dennis Kristoffer Bago.

Si Supt. Henry Biñas, hepe sa TCPS sa pakighinabi niini sa Banat News kagahapon nagkanayon nga si Puppy, Largo ug Bacus ang gipasakaan na nila og kasong robbery with homicide diha sa Talisay City Prosecutor ug naghuwat na lang sila sa warrant of arrest sa tulo.

Matud ni Binas nga dunay mianha sa police station kabahin sa nahimutangan ni Puppy ug gipanid-an kini sa mga operatiba apan naaktuhan ang nahisgutang suspek nga dunay dalang armas nga maoy ilang gihimong gibasehan sa pagsikop.

Si Puppy ang gikatakdang pasakaan usab og kasong illegal possession of firearm.

Si Puppy dihang gihinabi sa Banat News mihimakak sa pasangil batok kaniya ug mipasangil hinuon ngadto nila ni Largo, Bacus ug usa ka laing lalaking nailhan lang niya sa pangalang “Rokie” nga taga barangay Biasong maoy mitulis ug mipatay sa maong tinun-an.

Sumala pa niya tungod sa pagula sa iyang pangalan ug gipasanginlang suspek sa maong tulis naundang siya sa iyang pag-eskuyla og gipabalhin siya og puyo sa iyang inahan ngadto sa Minglanilla.

Gibutyag usab ni Puppy nga barkada niya sila si Bacus ug Largo ug gani nakakuyog siya dihang nanglabni ug cellphone sa usa ka babaye diha sa Tabunok kaniadto.

Matud niini nga uban usab siya niadto sa nahitabong tulis diha sa usa ka junk shop sa sitio Sambagan ug siya maoy gihimong “look-out”. - BANAT NEWS