Giimbestigar nga sakop sa MMT mi-resign

CEBU, Philippines - Niluwat na sa ilang katungdanan ang sakop sa Mayor’s Management Team (MMT) nga nasakpang nipanso sa Daily Time Record (DTR) sa iyang kauban.

Kini maoy gikompirmar ni Attorney Marie Velle Abella, ang labaw sa Employee-Management Committee On Investigation (Emcoi) sa City Legal Office.

Ang nahisgutang sakop sa MMT giingong niduso sa iyang resignation letter ug wala na mosumitir sa iyang eksplinasyon ngadto sa Emcoi.

Nasayran nga gipaimbistigar sa Emcoi ang maong MMT human usab iduso sa Civil Security Unit (CSU) ngadto sa City Attorney’s Office ang report niini nga nagbutyag nga naaktuhan si Russel Pernitez, usa ka buntag niadtong miaging buwan nga nipanso sa DTR sa iyang kaubang MMT nga si Chantele Decina.

Nagkanayon si Abella nga lakip sa niluwat sa trabaho mao si Decina hinungdan nga wala na nila padayona ang imbestigasyon niini.

Una nang gipadayag ni Mayor Tomas Osmeña nga siya dili gusto ug iyang kontra ang mga empleyado sa City Hall nga mga tikasan ug ang pagpanso sa DTR sa laing empleyado giisip niyang usa ka matang sa pagpanikas ug kini dili niya mapasaylo.

Posible hinuong dunay nakatambag sa duha ka MMT nga moluwat na lang sa trabaho kay sa magpaabot pa nga tangtangon sa serbisyo.

Kahinumduman nga laing duha usab ka MMT ang gipa-resign sa mayor sa ilang trabaho human makahimo og kahiwian diha sa City Hall.

Ang usa niini giingong nimaniobra usab sa iyang DTR, samtang ang laing MMT gikatahong nanghilabot sa kwarta nga gibilin kaniya. - Elly Bolonos (BANAT NEWS)