Nag-bike napunggit patay

CEBU, Philippines - Patay ang usa ka tigulang human madasmagi og sakyanan samtang nagsakay og biseklita sa national highway sa barangay Inayagan sa siyudad sa Naga niadtong Huwebes sa alas 9:10 sa gabii.

Ang biktima nga patay nang nahidangat sa tambalanan mao si Quintino Ravillas, taga Happy Valley sa V. Rama Ave. siyudad sa Sugbo samtang ang drayber sa multicab kolor gray nga nakadasmag kaniya mao si Roberto Gantuangco, 57, taga Lower Lipata lungsod sa Minglanilla.

Matud ni PO2 Ken Cabrera sa Naga Police dihang nahinabi sa Banat News sakay sa iyang biseklita gikan sa dakbayan sa Sugbo paingon sa barangay Tuyan Naga ang biktima niadtong tungora.

Ang multicab gikan sa lungsod sa Minglanilla ug paingon sa Poblacion, Naga apan pag-abot sa nahisgutang lugar kalit lang ni u-turn ang biktima ug uwahi nang nakabantay sa multicab nga nagsunod hinungdan nga nadasmagan gyud kini ug nadaro.

Daling gihunungan ug gihatud ni Gantuangco ang biktima sa South General Hospital gideklarar ni Dr. Arnel Anolao nga dead on arrival.

Ang drayber pagkahuman masayod nga namatay ang biktima boluntaryo dayun kining nitahan sa iyang kaugalingon sa kapulisan. - Darrel Carumba (BANAT NEWS)