Sakop sa MMT nga nakontrobersya gibalhin
CEBU, Philippines - Gibalhin na og laing buhatan ni Cebu City Mayor Tomas Osmeña ang kontrobersyal nga sakop sa Mayor’s Management Team (MMT) nga si Misty Majistrado.
Kini gikompirmar sa information officer sa City Hall nga si Nagiel Bañacia human usab masayod sa kamanduan gikan sa mayor.
Si Majistrado mao kadtong sakop sa MMT nga gilambigit sa kinabuhi ni Konsehal Edwin Jagmoc ug gikatahong dunay relasyon apan ang MMT nga maoy gisangunan sa pagpahigayon og imbestigasyon sa kontrobersiya wala makakita og bisan landong na lang sa katahap.
Una na hinuong gipanghimakak nilang Jagmoc ug Majistrado nga dunay nagpahiping relasyon sa ilang gipakita nga kaayo sa usa’g-usa.
Lakip ang asawa sa konsehal (Gina) nga nipamatuod nga ila rang higala ang MMT.
“Kay niingon man to sila nga gumikan sa ilang trabaho nagkasuod silang Edwin (Jagmoc), aron dili na magtagbo ang ilang dalan, aron dili ma-misinterpret ang ilang mga trabaho ibalhin nato,” nagkanayon si Bañacia. Gikan sa City Planning Development Office (CPDO), si Majistrado mao na unya ang mangulo sa inventory team sa General Services Office (GSO). - Elly Bolonos (BANAT NEWS)
- Latest
- Trending
