CEBU, Philippines - Drama lang ug scripted ang mga pamahayag ug pamasangil sa babayeng Filipino-American nga aktibistang nangangkong gisignit ug gi-torture sa militar niadtong bulan sa Mayo didto sa Tarlac sumala pa sa partilistang Alliance for Nationalism and Democracy.
Si Anad partylist Rep. Jun Alcover namahayag sa mga sakop sa media nga pulos bakak ug pangdaot lang sa administrasyong Arroyo ug pagbuling-buling sa imahe sa militar ang gihimo ni Melissa Roxas.
Si Alcover mipakita og usa ka video footage sa kampo sa New People’s Army sa Aurora nga nagpakita sa usa ka babayeng susama og dagway ni Roxas nga nag-training.
Si Roxas sakop sa Bagong Alyansang Makabayan (Bayan) sa US, mipasangil nga gisignit siya sa mga lalaking iyang gipasanginlang mga sundalo diha sa Tarlac niadtong Mayo ug giingong mi-torture kaniya.
Sumala pang Alcover, usa ka amasonang gusto nang mobiya sa NPA maoy mipadala kaniya sa maong video footage ug suwat sayo ning bulana, nagdumili hinuon siya paghingalan sa maong amasona tungod sa seguridad niini.
Ang maong amasona mibutyag nga si Roxas ang naa sa video ug kini giila sa kalihukan og “Ka Aya.” Dugang pa sa maong amasona diha sa suwat nga si Roxas gisignit sa ilang mga kaubang NPA human kini mahibaw-ing mobiya na sa kalihukan.
Ang mga pamahayag ni Roxas nakakuha sa atensyon sa Commission on Human Rights commissioner Leila De Lima kinsa mibahad usab nga manubag ang militar sa ilang kalapasan sa tawhanong katungod ni Roxas.
Si Alcover nanawagan pagpa-resign kang De Lima tungod kay nagduda na siya sa kaligdong sa pagpanerbisyo niini sanglit kaliwat sa bana niini ang nag-exile nga National Democratic Front ug Communist Party of the Philippines Jose Maria Sison nga nagbase na karon sa nasud sa The Netherlands. – BANAT NEWS