3 gipamusil 1 ang wanted

CEBU, Philippines - Tulo ang naangol usa niini usa ka giingong notadong wanted sa kasong robbery with homicide atol sa nahitabong ambush sa sitio Libaong barangay San Isidro lungsod sa Asturias niadtong Martes sa alas 8:00 sa gabii.

Ang mga biktima mao si Randy Tautho, 24, molupyo sa nahisgutang lugar, ug giingong pinangita tungod sa kasong robbery with homicide ug mga kauban niining sila si Richard Malambag, 21, ug Joselito Buhawe, 16, pulos mga molupyo sa nahisgutang lugar.

Matud pa ni PO1 Josephus Montesclarus sa Asturias Police dihang nahinabi sa Banat News nga ang mga biktima gikan nga nananggi sa ilang mais sa sayop ug naglakaw pas-an sa ilang mga sinakong mais pauli dihang giatangan ug gipamusil sa wala mailhing mga suspek.

Maayo nalang gani kay abtik nga nakadagan ang mga biktima dihang nabati ang sunod-sunod nga mga buto sa armas ug wala na mogukod pa nila ang mga mamumuno.

Si Malambag maoy nagrabihan human makaangkon og samad pinusilan sa dughan, samtang si Tautho samad pinusilan sa walang paa lang ug si Buhawe samad pinusilan sa walang paa ug pulos gidala sa Balamban District Hospital.

Human pagkasayod sa kapolisan sa pagkatawo ni Tautho nga duna kini pending warrant of arrest sa kasong pagtulis ug pagpatay nga nahitabo sa sitio Libaong sa milabay’ng tuig ilaha kining gidakop.

Si Toledo City RTC judge Hermis Montero maoy nagpirma sa warrant of arrest nga walay girekomendar nga pyansa alang sa temporaryong kagawasan.

Nagtuo ang kapulisan nga panimawos ang motibo sa maong pagpamanhig sa wala pa matino usab nga gidaghanon nga mga suspek ug padayun pa ang imbestigasyon sa kapulisan. - Darrel Carumba (BANAT NEWS)