Hepe wala dawata sa mayor sa Sibonga

CEBU, Philippines - Human gipalagpot isip hepe sa Consolacion Police Station wala dawata ni Mayor Lionel Bacaltos sa lungsod sa Sibonga si Insp. Elmer Fernandez nga maoy gitudlong hepe sa kapolisan sa maong lungsod.

Si Insp. Fernandez nga gikahinabi sa mga sakop sa media mibutyag nga niadtong Martes sa hapon mi-report unta siya didto sa lungsod sa Sibonga ug gipahibalo na lang siya ni Cebu Province Police director Sr. Supt. Jesus Gaquing nga dili na siya mahinayon   isip hepe sa Sibonga.

Matud pa niini nga si Gaquing mitug-an nga si Bacaltos mipahibalo nga iyang ipabilin si Insp. Allan Rosario isip hepe sa Sibonga human kini makalingkod og duha ka bulan isip Officer-In-Charge (OIC).

Sumala pa niini nga gipasabot siya ni Gaquing nga gusto sa mayor nga hatagan og higayon si Insp. Rosario makapadayon sa iyang pag-serbisyo sa Sibonga hinungdan nga misabot siya sa maong kamanduan.

Matud pa niini nga kasamtangan lang una siyang ibutang diha sa headquarter sa CPPO samtang magpaabot pa kini sa iya unyang bag-ong assignment. – BANAT NEWS