CEBU, Philippines - Nahilandig sa tambalanan ang napusilan ug ang namusil niini dihang ang naulahi kinsa misuway pagsibat, nadasmagan sa mini bus didto sa sitio Tataan, barangay Estaca, lungsod sa Compostela sa miaging gabii.
Ang napusilan mao si Frederick Mabalo Rodriguez, 30, minyo, nga taga barangay Cotcot , sa maong lungsod samtang ang suspetsado mao usab si Ritchele Tanedo, 21, ulitawo nga taga Estaca.
Matud pa ni PO1 Lauro Laurel sa kapolisan sa Compostela nga gikang mitan-aw og singing contest ang biktima dihang pagpauli niini sa ilang balay gisundan sa suspetsado. Apan sa kakurat sa biktima gipusil lang kini og kalit nga walay igong hinungdan , busa gilapsan sa bala ag iyang abaga ug nahagba siya sa yuta.
Gumikan sa pagtuo sa suspetsado nga patay na ang biktima kay miaksyon man kini og kirig, mikaratil siya og dagan ug malagmit gumikan sa iyang kahadlok, wala kini makaalinggat nga may nagbaguros nga mini bus sa iyang paglabang sa karsada. Hinuon nasuwerihan kini kay wala maintimano, busa silang duha, ang iyang napusilan ug siya gihatod dayon sa Vicente Sotto Memroial Medical Center sa dakbayan sa Sugbo.
Ang biktima sa pamusil nagkanayon nga pasuwerte lang kon kinsay mabugtoan nila sa kinabuhi sulod sa tambalanan. - Romeo T. Limpangog (BANAT NEWS)