CEBU, Philippines - Si Kongresista Benhur Salimbangon sa ika-upat nga distrito sa lalawigan sa Sugbo dili pa dugay misang-at sa House Bill 6642 sa Kongreso nga nag-amendar sa Section 13(c) sa Republic Act 6758 o ang Compensation and Position Classification Act of 1989 nga nagpahigayon sa step increment alang sa mga empleyado sa gobyerno.
Gipasabot ni Salimbangon nga ang mga pinili nga opisyal walay labot sa step increment base sa mga sirkular nga giluwatan sa Department of Budget and Management (DBM) .
Matud pa ni Salimbangon nga ang mga sirkular sa DBM nagkanayon nga ubos sa RA 6758, kini naghatag og step increment sa mga kawani sa kagamhanan base sa merito o sa ilang serbisyo.
Apan matud pa ni Salimbangon nga ang mga empleyado sa gobyerno, tinudlo man o pinili, magkalahi lamang sila sa paagi sa pagkasulod sa serbisyo sa gobyerno.
Midugang siya nga mahimong pinili o kaha tinudlo, kining mga empleyadoha kinahanglang makapahimulos usab sa susamang pribilihiyo ug benepisyo nga gihatag sa balaod ngadto sa mga empleyado sa kagamhanan sa ilang panerbisyo sa gobyerno.
Matud pa ni Salimbangon nga bisan tuod og gibatbat kini diha sa Local Government Code, ang mga pinili nga opisyal may igong basihanan bahin sa kantidad sa suweldo nga ilang gidawat pinaagi sa mga ordinansa .
Alang kaniya, maoy tuyo sa balaod nga tugotan ang mga opisyal nga pinili sa katawhan nga makapahimulos sa step increment.
Tungod niini aron kalikayan ang kalibog ug kalikayan ang paglapas sa gitawag nga spirit and intent of the law, kinahanglang klarohon ug suhitoon pag-ayo sa usa ka tataw nga probisyon kalabot sa maong isyu.
Section 2 sa gisugyot nga House Bill nagpasabot nga kun ang maong balaodnon mahimong hingpit na nga balaod, kinahanglang sugdan kini sa pagpaepekto sa Hulyo 1, 2001 ug kadtong tanang mga apektadong opisyal kinsa wala makadawat niining step increment kaniadto, may katungod na silang makapaningil niini isip salary differential nga dawatonon nila. - Wen Celen (BANAT NEWS)