Daghang armas sakmit

CEBU, Philippines - Usa ka giingong nagpailang miyembro og gun club wala maka-eskapo sa joint operation sa Regional Intelligence Division (RID-7) ug Criminal Investigation and Detection Group (CIDG-7) human nakuhaan og nagkadaiyang klase sa armas ug bala sulod sa panimalay niini niadtong milabay’ng buntag didto sa barangay Poblacion dakbayan sa Danao.

Ang nadakpan giila sa kapolisan nga si Joselito   Villacarillo alias “Tallut” tungod sa search warrant nga giisyu ni judge Soliver Peras sa Regional Trial Court branch 10.

Ang akusadong si Villacarillo nakuhaan og duha ka 9mm cal. KG9 machine pistol,  unom ka cal. 54 pistol, 12 ka magazine sa .45, lima ka magazine sa cal. 9mm KG9 machine pistol, duha ka silencer, 30 ka buhing bala sa 12 Jauge, 38 buhing bala sa cal.38, 1 cal. 5.56 colt rifle, usa sa 12 gauge shot gun, usa ka cal.45 pistol Ithaca, usa ka 357 cal., usa ka .38 revolver,174 ka buhing bala sa .45, tulo ka magazine sa 5.56, usa ka magazine sa short .45, duha ka magazine sa .45 pistol.

Ang maong mga armas gipresentar mismo ni Chief Supt. Lani-O Neres, direktor sa kapolisan sa rehiyon siete. Si Neres nagkanayon nga ila pang lantawon ang   impormasyon   nga dunay lisensya ang maong lima ka armas ingon man ang report nga miyembro kini sa gun club gumikan kay kadudahan usab kaayo ang pagtiner niini'g daghang armas sa iyang panimalay.

Gipadayag niini nga alarming kaayo ang pagtiner og daghang armas sulod sa panimalay ni Villacarillo ug posibling namaligya usab kini'g armas hinuon wala kini himoanan og armas ingon man dili usab miyembro sa kooperatiba diha sa Danao.

Giklaro usab niini nga ang kapolisan sa Danao nakatabang usab sa maong operasyon nga madakpan si Villacarillo ug gani wala kini mopakita’g pagsukol sa team sa kapolisan nga mironda sa panimalay niini.

Sumala pa niini nga ang maong pagpang-ronda kabahin kini sa gipatuman ni Presidente Gloria Macapagal Arroyo nga makunhuran og tres porsiyento matag bulan pag-account sa mga loose firearm. – BANAT NEWS