Emosyonal ang Necrological Service para ni Cory

CEBU, Philippines - Emosyonal ang gihimong necrological service alang sa mitaliwang si kanhi Presidente Corazon Aquino diha sa Manila Cathedral nga gitambungan sa iyang mga suod nga higala ug kabanay.

Lakip usab sa mitambong mao ang mga anak sa diktador nga si Ferdinand Marcos nga sila si Ferdinand “Bongbong” Marcos ug igsuon niining si Imee Marcos.

Sayo pa kagahapon, libuan ka mga tigpaluyo ni Aquino nga giisip nga “Icon of Democracy” dili lang dinhi sa Pilipinas kun dili sa tibuok kalibutan ang naglinya aron lang makalili sa patay'ng lawas sa kanhi pangulo sa Pilipinas.

Walay bisan usa sa mga mihatag og testimonials kabahin ni Aquino ang wala makahilak atubangan sa libuang mga tawong diha sa necrological service.

Lakip sa mga nakahatag sa ilang testimonials mao sila siJose “Peping” Cojuanco nga igsuon ni Cory; Nonila Uy nga usa ka Sugbuanon; kapikas ni kanhi House Speaker Jose De Venecia nga si Joe De Venecia; Quezon City Mayor Feliciano Belmonte; Maur Aquino-Lichaucu nga bilas ni Cory ug Makati Mayor Jejomar Binay.

Sagad sa gipangbatbat sa mga mihatag og testimonial pulos mga maayong kasinatian nila sa dihang ilang gikahimamat si Cory sa buhi pa kini ug sa gipakitang ka-simple niini ug kaligdong sa iyang pamunoan ug sa iyang pamilya, ilabi na ang iyang pagka-instrumental sa pagpabalik sa demokrasya gikan sa rehimeng Marcos.

Misira sa necrological service si Senador Benigno Simeon "Noynoy" Aquino pinaagi sa paghisgot sa iyang kasinatian sa iyang inahan.

Lubong

Sukad sa pag-abot sa patay’ng lawas ni Aquino diha sa Manila Cathedral gikan sa La Salle Green Hills nagpunsisok na ang mga tawong gustong makalili sa iyang lungon sa katapusan higayon hangtud kagahapon sa necrological service.

Nagbunga kini og grabeng pagkabara sa trapiko diha sa palibot sa Manila Cathedral hinungdan nga nag-reroute ang mga sakyanan palayo sa maong dapit. Gipaabot nga kung baga ang duot sa tawong misaksi ug misunod sa pagdala sa patay'ng lawas niini gikan sa LSGH ngadto sa Manila Cathedral gipaabot ngas mas daghan pa unya ang mosaksi karong adlawa atol na sa lubong.

Di kalikayan nga ikakumparar ang lubong kaniadto sa bana ni Cory nga si kanhi senador Benigno “Ninoy” Aquino tungod sa kadaghan sa mga tawong mitambong, apan ang kalainan lang sumala pa sa mga tigpaniid mao nga kaniadto kasuko batok sa gobiyerno mao nagpasulabi samtang sa lubong karong adlawa ni Cory gipaabot nga puno kini sa pagmahal.

Si Cory ilubong diha sa Manila Memorial Park tupad sa gilubngan sa iyang kapikas nga si Ninoy, si Cory namatay tungod sa sakit nga colon cancer niadtong Sabado sa kaadlawon. – BANAT NEWS