Entrance exam sa PMA himuon karong Agosto

CEBU, Philippines - Gipahibalo sa Philippine Military Academy nga dunay eksaminasyon alang niadtong mga interesadong mag-kadete sa prestihiyosong tunghaan alang sa mga opisyales sa Armed Forces of the Philippines karong Agosto 30.

Gipasalig sa kadagkuan sa PMA nga sayon lang ang proseso ug mga rekisitos aron mamahimong aplikante ug kadete sa PMA, una mao ang pag-fill-up og application form, kinahanglang dinhi natawo sa Pilipinas, walay criminal record, dili pa minyo o kasado, 5’4 ang height   kutob 6’4 sa mga lalaki samtang 5’2 usab sa kababayen-an.

Kinahanglang gradwado sa high school o ba kaha college level, may average grade nga 85 percent pataas, 17-anyos ngadto sa 22-anyos sa dili pa ang buwan sa Abril human sa pagpahigayon sa eksaminasyon ug labaw sa tanan baskog ang panglawas.

Ang usa ka aplikanteng madawat ug mamahimong kadete sa PMA makadawat og mga benepisyo sama sa full scholarship sa gobiyerno ug giswelduhan samtang nagtungha sa PMA, kahigayunang makat-on sa gikinahanglang makat-unan sa usa ka tawo sama sa academics, leadership ug physical fitness.

Ang makatapos sa upat ka tuig nga scholarship sa PMA dunay nagpaabot nga pwesto isip opisyal diha sa bisan unsang branch sa AFP sama sa Philippine Army, Philippine Navy ug Philippine Air Force.

Ang PMA application forms makuha sa Public Information Office, Central Command o sa mga ROTC offices sa mga kolehiyo ug unibersidad dinhi sa Sugbu ug sa tibuok nasud.

Human makumpleto ang application forms, ipadala kini sa Office of the Cadet Admission, Philippine Military Academy, Fort del Pilar, Baguio City 2602 apil na ang NSO authenticated birth certificate, certified true copy sa High School Form 137 duha ka semana sa di pa moabot ang eksaminasyon.

Mahimo sang mo-apply ang aplikante pinaagi sa internet sa www.pma.ph ug kumpletuha ang application form.

Ang eksaminasyon gikatakdang himuon sa Agosto 30, 2009 adlaw’ng Domingo sa mga testing centers sa Visayas: Southwestern University sa Cebu City; Holy Name University sa Tagbilaran City, Bohol; Siliman University sa Dumaguete City, Negros Oriental, West Negros College sa Bacolod City, Neg.Occidental; Iloilo City National High School sa Iloilo City; Headquarters sa 8ID, Camp Lukban sa Catbalogan, Samar; Leyte Normal University sa Tacloban City, Leyte. - Edwin Ian Melecio (BANAT NEWS)