52-anyos gi-ambush namatay

CEBU, Philippines - Gipusil ug napatay sa duha ka mga lalaking sakay og motorsiklo ang usa ka 52- anyos nga lalaki diha sa Purok-1 barangay Nangka lungsod sa Consolacion niadtong Lunes sa alas 8:30 sa gabii. Dead on arrival sa tambalanan mao si Nilo Aligno Judilla, 52, molupyo sa nahisgutang lugar samtang ang mga mamumuno igo lang gihulagway sa mga saksi nga duha ka lalaking nagsakay og motorsiklo.

Matud pa ni SPO3 Benjamin Ayuman sa Consolacion Police dihang nahinabi sa Banat News, ang biktima gikan nga nanabo sa merkado ug paingon na untang mopauli apan gisundan kini sa mga mamumunong sakay og motorsiklo.

Pag-abot sa nahisgutang lugar kalit lang kining gipadul-an dayun gipusil makatulo ka higayon sa bukobuko.

Daling gidala sa Vicente Sotto Memorial Medical Center (VSMMC) ang biktima apan namatay gyud kini paghiabot sa tambalanan. Ang kapulisan naka-recover og tulo ka basiyo sa bala sa kalibre .45 nga maoy gituohang gigamit sa mga suspek apan wala pa nila maestablisar ang motibo ug pagtumbok kung si kinsa ang mga mamumuno.

Usa sa gisusi mao ang panimawos nga anggulo gumikan kay nakapatay ang anak niini kaniadto, gisubay usab ang kabahin sa kaminyuon niini sanglit nagbuwag sila sa iyang asawa. - Darrel Carumba ug Romeo Limpangog (BANAT NEWS)