Bolo wa maka-komisyon sa Balili sale

CEBU, Philippines - Subling giklaro ni board member Juan Bolo nga wala gyud siya maka-komisyon sa P98 milyones nga gibayad sa kagamhanan sa probinsya sa Sugbu sa luna nga gipanag-iya sa Balili Property nga nahimutang sa barangay Tinaan, lungsod sa Naga.

Gihagit hinuon ni Bolo niadtong mga nangdaot kaniya nga mopirma og pinanumpaang pamahayag nga siya nakakwarta sa pagpalit sa maong luna aron iyaha kining tubagon sa hustong proseso.

“I never received a single centavo nga nakadawat ko og commission sa pagpalit sa maong luna,” matud pang Bolo sa dihang na-interview sa DyDD kagahapon.

Mipasabot si Bolo nga igo lang siya mituman subay sa kamanduan ni Gobernador Gwendolyn Garcia isip chairman sa committee on real property nga susihon ang maong luna.

Sumala pa niya human nila masusi ug matan-aw ang maong luna diha sa provincial board ila kini dayong giduso sa buhatan sa gobernador.

Gibutyag niya nga dunay walo ka titles nga nag-kober sa napulo ka luna nga may gilapdong 24 ka ektarya diha sa Balili property ug maoy gibayran og P98 milyones sa kagamhanan sa probinsya sa Sugbu.

Apan iyang giklaro nga sa miaging tuig pa nabayran sa probinsya ang maong luna sa pagpa-transfer ubos sa ngalan na sa probinsya sa Sugbu.

Nasayran sila si Atty. Gloria Estenzo ug Atty. Ben Cabredo pulos mga environmentalist maoy mi-kwestyon niining pagpalit sa maong luna gumikan kay dunay portion sa luna nga nasanapan sa dagat.

Apan si Bolo nagkanayon nga huwaton nalang ang resulta sa ipahigayong survey sa kagamhanan sa probinsya sa Sugbu ngadto sa maong luna diha sa Tinaan. - Uban sa report ni Darrel Carumba (BANAT NEWS)