Libuan miuban sa 'prosesyon' ni Cory

CEBU, Philippines - Liboan ka mga tawo ang mikuyog sa prosesyon kagahapon sa pagbalhin sa patay'ng lawas ni kanhi Presidente Corazon “Cory” Aquino gikan sa La Salle sa Greenhills ngadto na sa Manila Cathedral.

Si Aquino nga gibansagang “Icon of Democracy” namatay niadtong Sabado sa kaadlawon tungod sa sakit nga kanser sa kolon duha ka adlaw nga gihaya diha sa La Salle tungod kay usa ang maong dapit sa makasaysayanong hitabo sa iyang pagdagan kaniadtong 1986 sa pagkapangulo sa nasud batok sa rehimen ni Ferdinand Marcos.

Sa La Salle gihimo ang quick count sa National Movement for Free Election nga diin migawas nga siya maoy mananaog ug labaw og botos nga kapin sa 800 mil batok kang Marcos.

Apan sa ihap sa botos sa Comelec diha sa Batasan, si Marcos migawas nga mananaog tungod sa labaw nga kapin usa ka milyon nga botos nga gihulagway sa mga tigpaniid nga grabeng kalapad sa pagpanikas hinungdan nga 30 ka computer technicians sa Comelec ang mi-walkout sa counting.

Ang prosesyon nagsugod sa alas 11 sa buntag agi katibuk-ang karsada sa EDSA lahos sa Ayala Avenue, midesilya ngadto sa Gil Puyat ngadto na sa South Luzon Expressway padulong sa Quirino Avenue, ngadto na sa Roxas Boulevard hangtud sa Intramuros diin mahimutang ang Manila Cathedral.

Liboan ka mga tawong nagsuot og kolor yellow nga sinina, nagbitbit og banderang kolor yellow, mga streamers nga puno og pagdayeg kang Cory ug sa iyang bana maoy nagpasulabi diha sa giagian sa prosesyon.

Gidunganan pa kini sa mga confetti nga kolor yellow ug mga buwak nga gisabwag gikan sa mga buildings sa mga tawo.

Ang mga estudyante, ug mga trabahante sa Makati sa mga opisina sa nagpauwan og yellow nga mga buwak sa lungon ni Aquino dihang mitadlas kini sa Ayala Avenue ug Gil Puyat Avenue.

Sa Miyerkules Agusto 5, gitakda ang paglubong kang Aquino ug gideklarar kini ni Presidente nga Gloria Macapagal Arroyo non-working holiday sa tibuok nasud uban sa 10 ka adlaw nga pagbangutan sa tanang mga Pilipino sugod niadtong Agusto 1. (Lesley Caminade ug Romeo Limpangog)   (BANAT NEWS)