Sunog sa Catmon balay ugdaw

CEBU, Philippines - Naugdaw ang usa ka pinuy-anan sa sunog nga nitumaw sa sitio Sun-oc barangay San Jose sa lungsod sa Catmon niadtong Domingo sa alas 12:30 sa kaudtohon.

Matud ni PO1 Benjie Gan sa Catmon Police dihang nahinabi sa Banat News ang magtiayong Lucino ug Amelita Botangas maoy nanag-iya sa na-abo nga panimalay.

Usa ka nagpailang concerned citizen maoy mitawag sa telepono sa kapolisan kabahin sa sunog sa maong lugar hinungdan nga niresponde dayun ang mga firetrucks sa lungsod pinangulohan sa detailed fireman nga si SFO3 Joselito Enriquez ug lima ka mga fire volunteers.

Pag-abot sa maong lugar ang mga silingan nga molupyo mao nay nagtinabangay paghakot og tubig nga gisulod sa balde ug gisablig sa nasunog nga panimalay.

Gibanabanang sulod lang sa 30 minutos una nakontrolar ang maong sunog nga gipaubos lang sa 2nd alarm ug wala hinuoy naangol sa hitabo. Si SFO3 Enriquez padayun pa sa imbestigasyon pagtumbok sa hinungdan sa maong sunog ug pagtino kun pila ang kinatibuk-ang danyos niini. (Darrel Carumba)