Pimentel nasubo sa kamatayon ni Cory

CEBU, Philippines - Si manlalaban Aquilino Pimentel III mipadayag kagahapon sa iyang kasubo sa kamatayon ni kanhi Presidente Corazon Aquino.

Ang maong pahasubo iyang gipahayag atubangan sa mga estudyante sa abogasiya sa Southwestern University nga nagpahigayon og acquaintance party didto sa Crown Regency, sa Osmeña Boulevard, ning dakbayan sa Sugbo.

Isip pinasidunggang mamumulong, gibutyag ni Pimentel nga ang iyang pamilya ug ang pamilyang Aquino suod kaayo, nga gani sa mga gipahigayong mga politikanhong pangampanya   sa snap election sa tuig 1986, right hand ni Presidente Aquino ang iyang amahan nga si Senador Aquilino Pimentel Jr. ug sila kanunay ang magkuyog sa ilang mga biyahe ngadto nganhi sa Cebu.

Matud ni Pimentel nga ang kamatayon ni kanhi Presidente Aquino usa ka “great lost” o dakong haw-ang sa nasud tungod kay siya (Aquino) usa ka simbolo sa demokrasya.

Si Pimentel nanghinaot nga sa pagkamatay ni Aquino dili usab mamatay ang demokrasya sa nasud ilabi na karong nag-atubang kini og dakong hulga.

Usa sa mga hulga niini matud pa niya mao ang sama sa pagpanikas sa boto nga nasinatian niya niadtong milabay’ng piniliay.

Kahinumdoman nga human sa piniliay sa tuig 2007 si Pimentel miduso og election protest batok kang Senador Juan Miguel Zubiri kinsa giingong nanikas niadtong panahona.

Gibutyag niya nga maayo na kaayo ang dagan sa iyang protesta karon kay base sa gihimong internal count nila, dako na ang iyang labaw kang Zubiri ug dako kaayo ang purohan nga modaog siya sa maong protesta.

Si Pimentel mipasabot nga sa resulta sa eleksiyon didto sa Maguindanao niadtong tuig 2007 si Zubiri nakakuha og 195,000 nga boto samtang ang kang Pimentel 67,000 ug gibiyaan kini og 128, 000 ni Zubiri.

Karong gituki na sa Commission on Elections (Comelec) ang iyang protesta nasayran nga katunga sa mga lugar nga iyang giprotestahan, pulos mga peke ang balota nga gisulod sa mga ballot boxes.

Busa nakaingon si Pimentel nga kung peke ang maong mga balota “nagpasabot nga dili tinuod ang 195,000 nga nakuhang boto ni Zubiri”.

Si Pimentel sa iyang mensahe miawhag sa mga Sugboanon nga angayan nang palay-an si Presidente Gloria Arroyo unya sa election sa 2010 ug nanghinaot siya nga ang nasud makapili na og maayong lider sa maong higayon. (Brenda D. Batuto)   (BANAT NEWS)